السلام
البارح خرجو فيديوات في صفحة سكندالي في الفايسبوك و اللي انشأها صحفي اسمو حمدي بن صالح هو اللي صور رفقة زميلة تسريبات الراجحي اللي عملو خوضة في البلاد بشكل كشف كوننا شعب مزال في اغلبيتو ما يعرفش يتعاطى بتوازن و تريث مع الاخبار و التسريبات
للي فاتو الحديث، ملخص كامل مع الفيديوات و المصادر
البارح 04/05/2011 مع العشرة متاع الليل خرجت اول فيديوهاذي
، ملخص الحكاية انو الراجحي يحكي عالحكومة و دواليبها المتخبية و كيفاش الناس تتعين و تقال، مشاكل الداخلية، و خصوصا اتهام صريح لكمال اللطيّف بادارة البلاد من الخفاء و سيناريو محتمل لانقلاب عسكري حسب رأيه
و مبعد شنع الفايسبوك و التويتر على هاشتاغ
بين مساندة اختلفت اشكالها و اهدافها (مثلا هنا دعوة لحماية الراجحي، 20.000 فان في ليلة، و هنا دعوة لتوليه الرئاسة جملة) و بين توجس و اشتباه حضرو بقوة اكثر في تويتر، و فمة زادة تدوينات (تنجمو تبربشو تن بلوغز) باش نحكيلكم على وحدة بالذات مبعد
الحاصل شنعت و بما انو صفحة سكندالي وعدت ببقية الفيديو، الخبر شعل و الناس الكل باتت قاعدة بما يذكر بليلة 12 جانفي اللي خرجت فيها اشاعة الانقلاب العسكري و الجيش محاصر القصر و موجود في المرسى الخ الخ
صار انقطاع عام للانترنات ب 14 دقيقة في الانترنات حوالي 00:46 صباحا، و هي حاجة زادت دخلتها بعضها و دعمت نظرية صحة تسريبات الراجحي و كون الحكومة تحب بكل ثمن تطمس اي اثر ليها، و فمة شكون قال العكس، يحبو يركحو الهستيريا اللي ممكن ترحّل البلاد
مبعد بشوية اتصل فرحات الراجحي باكسبراس اف ام، واللي كان وعدهم في مكالمة سابقة قصيرة بش يكلمهم غدوة الصباح و عمل معاهم حوار اكد فيه تمسكه بكل كلمة قالها بل و زاد حلل و توسع في النظرية متاعو و في الاتهامات اللي قالهم
بعد الحوار هذا تويتر شعل بالمقتطفات منو و بدات الآراء تتهاطل و كي العادة تنبير، تشي غيفارية و الا بكل بساطة دعوات للانتظار و التثبت
اليوم صارت برشة ردود فعل اهمها مظاهرات في القيروان و صفاقس نتصورها منجرة عن الدعوات الى ثورة ثانية اللي خرجت على فايسبوك بعد التسريبات، و تعليق من طرف كمال اللطيّف لكلام الراجحي، كما اني بقية الفيديوات متاع الحوار مع الراجحي خرجت هنا، هنا و هنا كما انو بعض الشباب تولى حماية و مرافقة الراجحي كيما في الفيديو هاذي، كما انو صار حوار مع اللي عمل الفيديو هنا ظهر فيه واثق من صحة كلام الراجحي و مساند ليه
باقي فمة تساؤلات من نوع هل فيبالو قاعد يتصور وقتها و الا لا؟ و ردود فعل كيما الناطق باسم الحكومة هنا اللي يعتبر اجمالا انو الراجحي غير مسؤول و يخلق في بلبلة فارغة في البلاد
ملاحظات على طريقة تعاملنا مع التسريبات و ما كشف عن طريقها
انا شخصيا مانيش باش نقول مع او ضد، او هل انو الراجحي محرر البلاد او مجرد متآمر يحب على خلاها، لكن عندي شوية ملاحظات، بغض النظر عن صحة او كذب ادعاءات الراجحي
تسريبات كيما هاذي، بالعمق و الخطورة هاذي، هي حاجة اول مرة تصير في تونس على مستوى كيما هذا، الشيء اللي يفسر الهستيريا الجماعية و الاندفاع اللي يوصل لحد تقديس الراجحي او سبان جدو العاشر، و الخلاصة هي انو في وضعية كيما هاذي احسن حل هو مطالبة الحكومة بتفسيرات و الضغط عليها، و مطالبة الراجحي بدلائل ملموسة على ادعاءاتو، مع انتظار نتائج القضية اللي بش يرفعها اللطيّف ضد الراجحي في مرحلة ثانية
معناها موش في ليلة كل شيء يتحسم، ناخذو وقتنا و حذرنا مالتسرع و الاندفاع
بالنسبة للطيّف ظهرلي متوتر و منفعل بطريقة مبالغ فيها و سيبلنا جمل مشهودة كيما "مسؤول يقعد مع حوّات؟" و هو الشيء اللي يخليني نشك فيه اكثر و اكثر خاصة و انو قال على الراجحي برشة مرات "ما عندوش خبرة سياسية" من غير تكذيب واضح و صريح بل اتهامات بما يشابه "حبوب الهلوسة"، بل انو فمة شكون عمل تحليل معقول ياسر (و هنا زادة) ينتج عنو كونو اعترف لاشعوريا بالتهمة، الحاصيلو حكايتو فيها انّ
البارح مزال الراجحي كي كمل حكايتو على اكسبراس اف ام، يعمل هكة الرفيق "تونسي و افتخر" يطلعلنا بتدوينة ثورية غرّاء عنوانها "ليلة الثورة الثانية في تونس" و الجملة الاولى فيها "أكتب هذه التدوينة السريعة بطلب من الثوار العرب (ادهم صبري متاع التدوين يخليهملو قداشو لوجيك ههههه) لتفاصيل ما حصل الليلة في تونس" لخّص فيها الاحداث (اللي مزالت في نصفها كان موش في ربعها)، و بكل تسرع و مراهقة فكرية استخلص انو الثورة الثانية غدوة الخ.. و هو مثال لذيذ للسذاجة و التسرع متاع ثوريي "جاي مالتالي و يعيط يا مالي" اللي تعبات بيهم الدنيا مؤخرا، و هاهي التدوينة و ربي يجبرلو الاخ
كليكي عالتصويرة ليطمئن قلبك
و هنا ردود فعل التوانسة اليوم الصباح ههههههه شطرهم ما فيبالهمش حتى بالحكاية شنية
فمة برشة يقولو الراجحي غير مسؤول و متآمر، انا ظهرلي يحكي بصورة عادية في احداث عاشها، تكشفلنا لاول مرة المخبي وراء مظهر الحكومة متاع الصدق في القول و الاخلاص في العمل، و اللي هو طبعا باش يخالف افكارنا المسبقة الطوباوية من نوع الشفافية كاملة و الشرعية بيد الشعب
و الراجل يحكي مرتاح و مقتنع بكلامو، و يظهرلي نظرية تآمرو على الدولة ممكن اقصاؤها من توة خاطرو نتيجة لتصريحاتو واقف وحدو امام السلطة كاملة و امام اللطيّف اللي على ما يبدو واصل بالضبط و امام رشيد عمار بدون حليف كان ما تيسر من الشعب، و لذا فانو ما يلبيش مواصفات مؤامرة اللي عموما تكون غير تلقائية و معتمدة على حاجات نتائجها مضمونة موش كيما تصريحات مفاجئة تماما للبلاد كاملة تقلب الاقوياء الكل ضدو
صادق و الا كاذب موش هو السؤال، الراجحي وفى دوره بعد نقل روايته للاحداث، التبعات سلبية كانت او ايجابية هي نتيجة مباشرة لتعاطينا مع تسريبات من هالنوع: الفوضى هي نتاج لانسياقنا الاعمى كقطيع وراء التصديق او التكذيب دون تريث او تمحيص، و لذا اخطاو الراجحي و ابداو خدمو مخاخكم، ما ترجعولو كان في حالة طلب ادلة على صحة كلامو
و اخيرا تعملت فضيحة على ذكره للسواحلية شادين البلاد، قالك هاو نعرات جهوية هاو رويق بارد
نحب نذكركم اللي كلامو موضوعي في الحكاية هاذي، الناس الكل تعرفو اما نخبيو فيه هكة حفاظا على "عدم الجهوية" بتكريس الانتساب الى الجهات ك تابو
(tabou)
ينتج عنو اغفال عدة معطيات موضوعية مثل كون بورقيبة خدم الساحل بشكل استثنائي و تلّف المناطق الداخلية، و كون المخلوع ساحلى و من جرتو طلعو برشة سواحلية و احتكرو المناصب العليا الخ
المشكلة ميش في الحقائق هاذي لكن في تعاطينا معاها:
هل نستنتجو انو السواحلية الكل اشرار و ناس غنية و واصلة و لازم نكرهوهم؟ لا طبعا، هوما وخياننا و اولاد بلادنا و عايشين كيفنا
هل نستنتجو ان الدولة لازم تتلّف الساحل انتقاما؟ لا طبعا
هل نستنتجو كوننا لازم نفيقو لللوبيات الجهوية في اعلى هرم السلطة؟ اي نعم
هل نستنتجو كونو لازمنا توازن في التمثيل الجهوي في السلطة بين مختلف الجهات؟ اي نعم
هل نستنتجو كوننا لازم نعملو مجهود للنهوض بالمناطق اللي همشوها بورقيبة و المخلوع؟ اي نعم
استنتاجاتنا هي المهم، موش الخبر في حد ذاتو
بما اني ما نبرت على حد (تقريبا) في هالتدوينة، نختمها بتنبيرة متاع بوكشان صحيح هههههععع
Bravo pour ce post, pour une fois je vois une bonne analyse qui est très bien fondée, personnellement j'adhère à tout ce que t'as, il faut surtout pas se précipiter et attendre la suite et les preuves des deux côtés pour pouvoir juger. Merci encore :)
ردحذفMerci à toi YoYo, tu es la bienvenue :)
ردحذفlol ... sa7a 3idoudi ... une analyse sérieuse pas comme d'habitude :p
ردحذفmais je suis d'accord avec toi sur presque tout ...une chose que tu as oublié je crois de mentionner ... Rajhi se contredis dans ses interviews ... et je ne sais pas si c'est due à des menaces probables , ou bien que sur ces points là il n'était pas sincère ...
Le seul mérite de Rajhi est qu'il a osé dire haut ce que presque tous les Tunisiens disent entre a eux... il a confirmé des doutes et des soupçons.....n'oubliez pas l'enjeu du moment: le fameux article 15 sur lequel le gvt provisoire doit se prononcer aujourd'hui.. ce que de semonce obligerait peut etre BCS à accepter la proposition initiale: foutre les RCD pendant 23 ans...
ردحذفكاليمارو:
ردحذفهههه ماو كيما قال اليوم خمر و غدا امر، وقيّت بش الواحد يولّي جدّي، اما تفرّج التدوينة اللي الفوق هههه ما نجمتش نطوّل برشة
بخلاف هذا عندك الحق، مرة يقول فيبالي بالتصوير مرة يقول لا، اما واضحة: وحل و موش عارف كيفاش يسلّكها
حوسي:
مرحبا بيك :)))
انا بيدي هذاكة بشنوة مقتنع: الراجحي قال الحقيقة (او جزء كبير منها)اما كي وحل بدا يفنّد في كلامو باش يسلّكها
شكرا على التذكير بحكاية الفصل 15